Dáil Éireann Debate, Wednesday - 25 March 2026
472. D'fhiafraigh Deputy Aengus Ó Snodaigh den Aire Forbartha Tuaithe agus Pobail, agus Gaeltachta cén tacaíocht ón Ciste Oileán Roinnte atá tar éis bheith dáilithe aige ar fiontair Gaeilge aige, de réir méid agus céadatán den iomlán sa bhuiséad sa Choiste chuile bliain ó bhunaigh sé é maidir leis and Ghaeilge. [23930/26]
View answerIs í aidhm an Tionscnamh um Oileán Comhroinnte an oiread leas agus is féidir a bhaint as na deiseanna ar fad a eascraíonn as Comhaontú Aoine an Chéasta chun comhoibriú, caidreamh agus comhthuiscint a fheabhsú ar an oileán seo chun teacht ar chomhaontú maidir le todhchaí chomhroinnte.
Leagtar amach clár oibre uaillmhianach sa Chlár Rialtais chun oileán comhroinnte a thógáil, le tacaíocht leanúnach tríd an gCiste um Oileán Comhroinnte chun athmhuintearas, meas frithpháirteach agus fás a chothú.
Cuireann an Rialtas leithdháiltí ar fáil d’Airí faoin gCiste um Oileán Comhroinnte chun tionscadail infheistíochta agus cláir chomhoibrithe a chur chun cinn chun cuspóirí an Chláir Rialtais agus an Phlean Forbartha Náisiúnta a chur i bhfeidhm mar a bhaineann leis an Oileán Comhroinnte, ag obair i gcomhar le comhghleacaithe i bhFeidhmeannas Thuaisceart Éireann agus Rialtas na Breataine, agus le comhpháirtithe údaráis áitiúil, institiúidí oideachais agus sochaí sibhialta ar fud an oileáin.
Tá an maoiniú seo á chur ar fáil chun infheistíocht a dhéanamh i dtionscadail nua dírithe ar chomhoibriú Thuaidh Theas, lena n-áirítear tograí dírithe ar an nGaeilge agus ar theanga, cultúr agus oidhreacht na hUltaise i dTuaisceart Éireann agus cois teorann.
Tá €6 milliún in airgead caipitil curtha ar fáil go dtí seo ón gCiste um Oileán Comhroinnte mar thacaíocht do thionscadail Ghaeilge agus Ultaise - €2m in 2022 agus €4m in 2025 - mar aon le maoiniú ó mo Roinn fhéin, a dhéanann maoirseacht ar sheachadadh an mhaoinithe, i gcomhar le comhpháirtithe i dTuaisceart Éireann. Meastar go mbeidh 75% den mhaoiniú seo á chur ar fáil do thionscadail Ghaeilge.
Chuige sin, bhí an-áthas orm a fhógairt le déanaí go bhfuil maoiniú €4.8 milliún san iomlán thar 4 bliana ceadaithe agam don Chiste Infheistíochta Gaeilge chun cómhaoiniú a dhéanamh ar thograí pobail Gaeilge i dTuaisceart Éireann.
Tacaíonn an Ciste Infheistíochta Gaeilge le heagraíochtaí pobail agus deonacha a chuireann an Ghaeilge chun cinn agus gur mian leo tionscadail chaipitil den chineál éagsúla a fhorbairt. Táim ag súil go mór le toradh na dtionscadal atá á bhforbairt ag an gCiste a fheiceáil.
Roimhe seo, cuireadh maoiniú €1 milliún ar fáil do Naíscoil na Seolta don chéad chéim d'fhorbairt áiseanna cuí do naíonraí / naíscoil lán-Ghaeilge ar shuíomh slán in Oirthear Bhéal Feirste. Tá an naíscoil ag dul ó neart go neart ó osclaíodh na háiseanna nua i mí Eanáir 2025.
Anuas air sin, dár ndóigh, tá soláthar iomlán reatha d’os cionn €20 milliún san áireamh i Meastacháin mo Roinne i mbliana do chomhoibriú trasteorann chun tacú, ach go h-áirithe, le hobair an Fhorais Teanga chun an Ghaeilge a chur chun cinn ar fud an oileáin agus chun feasacht agus úsáid níos leithne na hUltaise agus cultúr na hUltaise a chur chun cinn.
