Oiliúint Múinteoirí

Thursday, 15 January 2026

Questions (337)

Naoise Ó Cearúil

Question:

337. Deputy Naoise Ó Cearúil asked the Minister for Education and Youth an bhfuil sí ar an eolas go luaitear sa cháipéis Céim: Caighdeáin d’Oideachas Tosaigh Múinteoirí (An Chomhairle Mhúinteoireachta, Deireadh Fómhair 2020, lch 14) an méid seo a leanas maidir leis an gcaighdeán atá le baint amach ag múinteoirí bunscoile faoi oiliúint: Gaeilge - Ní mór muinín agus inniúlacht an mhúinteora faoi oiliúint sa Ghaeilge, lena n-áirítear, Gaeilge labhartha, a fhorbairt go leibhéal leordhóthanach chun cur ar a gcumas curaclam na bunscoile sa Ghaeilge a theagasc. Áirítear anseo, ach níl sé teoranta d’fhoghlaim teanga mar chuid den Tréimhse Foghlama sa Ghaeltacht; an dtabharfaidh sí soiléiriú maidir leis an gcaighdeán Gaeilge, de réir leibhéil an FTCE, atá i gceist leis an inniúlacht sin atá ag teastáil chun curaclam na bunscoile sa Ghaeilge a theagasc [3086/26]

View answer

Written answers

Minister for Education and Youth

Leagann mo Roinn síos na híosriachtanais iontrála don Gaeilge, Béarla agus Matamaitic le haghaidh iontrála ar Chláir Oideachais Tosaigh Múinteoirí (OTM) bunscoile, agus ní mór do gach iarratasóir ionchasach ar chláir Bhaitsiléara san Oideachas bunscoile agus MGO a chomhlíonadh.

Faoi Alt 38 d’Acht na Comhairle Múinteoireachta, tá cláir oideachais tosaigh múinteoirí faoi réir athbhreithnithe agus creidiúnaithe ag an gComhairle Múinteoireachta, chun críocha clárúcháin. Rinne an Chomhairle athbhreithniú ar a beartas maidir le caighdeáin do chláir oideachais tosaigh múinteoirí agus d’fhoilsigh sí caighdeáin nuashonraithe i gCaighdeáin Céim um Oideachas Tosaigh Múinteoirí in 2020.

Tá ról ríthábhachtach ag Céim maidir le cáilíocht agus éifeachtacht an oideachais múinteoirí in Éirinn a mhúnlú. Leagtar amach sna caighdeáin seo na riachtanais nach mór do gach clár Oideachais Tosaigh do Mhúinteoirí a chomhlíonadh chun creidiúnú gairmiúil a fháil ón gComhairle Mhúinteoireachta, rud a chinntíonn go bhfuil oideachas múinteoirí comhsheasmhach, cuimsitheach agus ailínithe leis na dea-chleachtais. Trí chaighdeáin shoiléire a bhunú maidir le dearadh clár, acmhainní agus socrúchán scoile, cuidíonn Caighdeáin Céim le creat láidir a chruthú a thacaíonn le forbairt oideoirí inniúla agus machnamhacha.

Tá cláir atá creidiúnaithe faoi Chaighdeáin Céim d’Oideachas Tosaigh Múinteoirí bunaithe ar na réimsí staidéir riachtanacha seo a leanas: Staidéir Bhunúsacha, Staidéir Ghairmiúla, agus Socrúchán Scoile.

Tá sé de fhreagracht ar Institiúidí Ardoideachais a chinntiú go gcomhlíonann múinteoirí faoi oiliúint na Caighdeáin mar atá leagtha amach i gCéim.