Mar a thug an Teachta le fios, ní mór do gach iarratasóir ionchasach ar chláir Máistreachta Gairmiúla san Oideachas (MGO) sna ceithre choláiste oiliúna múinteoirí atá maoinithe ag an Stát, chomh maith le H4 sa Gaeilge a bhaint amach san Ardteistiméireacht (nó a chomhionann), an próiseas iarratais a chomhlánú mar atá leagtha amach ag an Institiúid Ardoideachais (IAO) ábhartha.
Roimh 2019, chun iarratas a dhéanamh faoin mbealach MGO chuig múinteoireacht bhunscoile, b’éigean d’iarratasóirí a raibh na híosriachtanais iontrála sa Bhéarla, sa Ghaeilge agus sa Mhatamaitic comhlíonta acu cheana féin roinnt scrúduithe béil Gaeilge a dhéanamh, toisc go raibh a n-agallaimh féin ag IAOnna chun inniúlacht sa Bhéarla agus sa Ghaeilge araon a chinneadh.
Ó 2019 i leith, rinneadh an próiseas iarratais do na soláthraithe bunscoile MGO atá maoinithe ag an Stát a chuíchóiriú, agus ó shin i leith, tá ceanglas ann go mbeadh Pas le Tuillteanas bainte amach acu sa scrúdú béil Gaeilge de Theastas Eorpach na Gaeilge (TEG) Meánleibhéal 1 (B1). Tháinig an t-athrú cleachtais seo chun cinn ar iarratas ó sholáthraithe MGO bunscoile atá maoinithe ag an Stát (Ollscoil Chathair Bhaile Átha Cliath, Ollscoil Mhá Nuad, Institiúid Oideachais Marino agus Coláiste Mhuire gan Smál).
Leanann Coláiste Hibernia, soláthraí príobháideach clár MGO bunscoile, leis an gcleachtas gach mac léinn ionchasach a chur faoi agallamh mar chuid dá phróiseas iarratais, agus leanann sé le scrúdú béil Gaeilge a áireamh chun inniúlacht teanga an mhic léinn a chinneadh. Ní mór d’iarratasóirí a bheith in ann comhrá leanúnach agus éasca a dhéanamh leis na scrúdaitheoirí agus réimse ábhar a phlé go soiléir. Ba chóir dóibh ardchaighdeán cruinnis, líofachta, tuisceana agus fuaimnithe a léiriú, i gcomhréir le caighdeán B1 an scrúdú béil TEG. Glacfaidh an coláiste le Pas le Tuillteanas ag leibhéal B1 sa TEG (scrúdú béil) in ionad an agallaimh Gaeilge, i gcás inar baineadh amach é laistigh den dá bhliain roimhe sin.
