Mar a luadh sa Dáil an tseachtain seo caite, ní féidir leis an Stát ceannaireacht a dhéanamh i ngach clár comórtha. Dá réir sin, is é cur chuige mo Roinne tacú le pobail áitiúla agus le daoine aonair a bhfuil suim acu ann agus iad ag cruthú a dturas comórtha féin.
Sa chomhthéacs seo, tá an Clár um Mhaoiniú Deontais Comórtha d’Údaráis Áitiúla 2026 díreach seolta ag mo Roinn. Scríobh mé chuig na húdaráis áitiúla uile ag leagan amach treoirlínte ardleibhéil chun cabhrú le pobail áitiúla comóradh a threorú agus a mhúnlú.
Oibríonn an tAonad Comórtha i mo Roinn go dlúth lenár bpríomh-chomhpháirtithe freisin chun a chinntiú go ndéantar comóradh cuí ar imeachtaí stairiúla suntasacha, lena n-áirítear trí chomhoibriú féideartha le Ard-Mhúsaem na hÉireann agus Leabharlann Náisiúnta na hÉireann.
Tá roinnt tionscnamh ó Ard-Mhúsaem na hÉireann á measúnú faoi láthair.
Tá Leabharlann Náisiúnta na hÉireann, ina bhfuil Bailiúchán John Devoy, tar éis a chinntiú cheana féin go bhfuil buaicphointí ón gcartlann seo ar fáil ar líne. Tá áthas orm a chur in iúl daoibh freisin go bhfuil sé deimhnithe ag an Leabharlann go ndéanfaidh siad atáirgeadh ardchaighdeáin de dhoiciméid bhunaidh ón mbailiúchán a bhronnadh ar Chomhairle Contae Chill Dara, atá ag smaoineamh faoi láthair ar thaispeántas féideartha níos déanaí sa bhliain.
